نبض الكلمات 

فجأه .... 

فجأه كده يجي في بالك تنزل تمشي تحت المطر 

عمرك ما نزلت تمشي تحت المطر .... 
خلاص ...  انت اخدت القرار و لبست تقيل ونزلت ....
مشيت تحت المطر ... يمكن المطر و هوا نازل تنزل معاه همومك ...
مشيت من غير هُدى ....  خليت رجلك هيا اللي تسوقك ....


الناس بتجري بعيد عن المطر و انت ماشي تحته .. الناس شايفاك اهبل محدش عارف اللي جواك ..

 تبص في وشوش الناس دي تلاقي الناس كلها هموم و كأن الهموم دي بتلزق في الوش مش في القلب ... مين اللي مشيل الناس دي كلها في وشوشها .. ؟؟!!  

و في لحظة التفكير دا تلاقي نفسك في مكان بتشبه عليه ... المكان دا انا عارفه .. المكان مش غريب عليا ... الكمان دا كنت بحب اروحه زمان ....

 ساعتها , و ساعتها  بس عرفت ايه اللي خلاك تمشي تحت المطر ...
                                                                                   
                                                                                     (حدث بالفعل)                                                                                       15/2/2014

الى متى ؟؟!!

إلى متى سيظل السكوت ..

إلى متى و نحن نموت ..

إلى متى سنظل فقط نفكر في القوت ..

إلى متى سنظل سلبيين .. 

إلى متى سنظل تابعين ..

إلى متى الخنوع ..

إلى متى الذل والهوان ..

إلى متى الإنكسار ..

إلى متى التفريط في الحقوق ..

إلى متى سنترك اشباه الرجال يحددون مصيرنا ..

كفي .. حان الوقت ..

كفى ظلما .. 

كفي بهتانا ..

كفى قمعا ..

كفى طغيانا ..

كفى قهرا .. 

كفى..كفى..كفى..كفى..كفى..كفى..

حان الوقت حتى نصدع بالحق ..

حان الوقت حتى نُزهِقَ الباطل ..

ابدأ بنفسك ..

تخلص من سلبيتك ..

اجمع فُتات نفسك ..

تحلى بالإراده ..

لا تتخلى عن حلم واحد من احلامك ..

امسك معولك , فأسك , قلمك , سلاحك , وقاتل من اجل حلمك ......

رساله الى المستقبل

ولادي حبايبي :) 

وحشتوني اوي يا ولاد ... انا بابا محمود ..

بكتب ليكوا رساله قبل ما تتولدوا بـ 10-15 سنه كده وللا حاجه ... 

عشان تعرفوا ان بابا حبيبكوا بيحبكوا قد ايه... 

بحبكوا قـ(ااااااااااا)ـد الدنيا دي كلها ..

 مامتكوا كمان بتحبكوا اوي ... هلاقيها ان شاء الله ... متقلقوش يا ولاد ان شاء الله هختار مامتكوا زي القمر زيكوا كده ... هتكون احلى ام في الدنيا عارفين ليه ؟؟ عشان ( تيته ) هيا اللي هتختارها لباباكوا ان شاء الله ...

 ان شاء الله تكونوا كده شبه ماما في كل حاجه عشان انا بحب ماما عشان هتجبلي احلي حاجه في حياتي انتوا يا حبايبي ..

جدو (أحمد) بقى بيموت فيكوا و نفسوا يقابلكوا اووي و هيدلعكوا احلى دلع 

جدتكوا بقى دي احلى حاجه حصلت  في حياتي و حياتكوا دي بقى اللي ان شاء الله يا رب كده اللي هتلاقوا منها طيبه و حنان 

وصيتي ليكوا بقى :

- طاعة ربنا و طاعة بابا و ماما

-الصلاه في مواعيدها ( في المسجد للصبيان )

- حفظ القران الكريم  عشان دي وصية جدو (أحمد) و أكيد انتوا مش عاوزين جدو يزعل , عشان هوا حفظني القرآن (ربنا يجعله في ميزان حسناته يارب ) و قالي كل لما تيجي تقرأ قرآن قول " رب ارحمهما كما ربياني صغيرا" و قالي حفظ ولادك القرآن يا محمود ...
- اوعى حد يزعل ماما عشان مش هنلاقي زيها يا ولاد

-المذاكره والاجتهاد بقى عشان نفرح بيكوا انا و مامتكوا 

-صلة الرحم : دايما تزورا اعمامكم مصطفى و محمد و عماتكم ايناس و نسنيم و اخوالكم وخالتكم 

اخر حاجه بقى ربنا يجيبكوا بالسلامه الاول و يحميكوا يا رب و نعرف نربيكوا احلى تربيه 
                                                                     بابا :
                                                                             محمود :)
                                                                                       9/2/2014 

بكل الحروف أحبك

أ: أحبك عشان انتي اللي....

ب: بتخلي حياتي ليها معني و ...

ت: تملي عليا حياتي.

ث: ثروة انتي و ..

ج: جمالك سحرني 

ح: حبيبة قلبي

خ: خليكي جنبي 

د: دايما تبقي سندي ف الحياه 

ذ: ذكريني دايما بالطاعه و الصلاه عشان نصلي سوا 

ر: رقيقة حتى وانتي ..

ز: زعلانه بس حتى  و انتي زعلانه ببقى...

س: سعيد عشان بحس ان انتي الطفله بتاعتي و

ش: شخصيتك بتبقى زي الاطفال بالظبط

ص: صورك هتملى بيتنا ان شاء الله 

ض: ضميني جوا حضنك و ..

ط: طبيعي الولاد يكونوا معانا برده :) 

ظ: ظ ظ ظ ظ صعبه اوي دي :)

ع: عمري في يوم ما هبعد عنك 

غ: غيرتي عليكي فاقت كل الحدود

ف:  فوق راسي هشيلك 

ق: قدام عينيكي بنسى همومي 

ك: كلامك ليا بيقويني ...

ل: لما بنام بحلم بيكي ... لسه .. 

م: مجاش لسه اليوم اللي

ن: نبقى فيه لبعض 

هـ: هوايا ملأ قلبي خلاص مش قادر

و: وحشاني بجد  

ي: يا حبيبتي ......

ملحوظه : هذه الكلمات من محض الخيال ولا يوجد تطابق بينها و بين الواقع :)
مستوحاه من 28 حرف :)

حياتي معاكي برسمها .... جوايا حاجات هموت واقولها

معاكي الدنيا انا مالكها..... انتي من الدنيا عليا كفايه 

نفسي اخدك من ايديكي .... وللسما اطير بيكي 

وفي القمر اشوف عنيكي .... و نبدأ اجمل حكايه 

يا اجمل هبه من ربي .... يا رب دا كتير على قلبي 

انا بس عايزها تبقى جنبي .... مهما الظروف قست علينا 

ابقا ليها انا بتمنى .... بشوف في عنيها نور الجنه 

بجد خلاص مش قادر استنى .... ومش ذنبنا اننا حبينا 

بغير؟ , لأ أنا بموت عليكي .... في مكان مقفول هحتفظ بيكي

و محدش غيري يحب فيكي .... امتى هيتحقق حلمي 

 يا اجمل حب عايش جوايا .... هكمل معاكي للنهايه 

مهما كانت البدايه .... أكيد هنبقى لبعضنا 

يا اجمل هبه من ربي .... يا رب دا كتير على قلبي 

انا بس عايزها تبقى جنبي .... مهما الظروف قست علينا 

ابقا ليها انا بتمنى .... بشوف في عنيها نور الجنه 

بجد خلاص مش قادر استنى .... ومش ذنبنا اننا حبينا